काठमाडौँ । विभिन्न देशका सांसदहरु सम्मिलित हुने विश्व बैंक र अन्तर्राष्ट्रिय मुद्राकोष सम्बन्धी अन्तर्राष्ट्रिय सञ्जालको वोर्ड सदस्यमा नेपालका सांसद गगन कुमार थापा सन् २०२१ देखि २०२३ का लागि निर्वाचित भएका छन् । वोर्ड सदस्यका रुपमा उनले विश्वका १४० भन्दा बढी देशका संसदहरूसँगै समावेशी विकासका लागि काम गर्ने भएका छन् । यस अवसरलाई आफूले सिक्ने, सम्वन्ध विस्तार गर्ने र सक्दो योगदान गर्ने मौकाको रुपमा उपयोग गर्ने सांसद थापाले बताए ।
नेपाली काँग्रेसबाट उम्मेदवार भइ काठमाडौको क्षेत्र नं. ४ बाट उनी प्रतिनिधि सभा सदस्यमा निर्वाचित भएका हुन् । थापा पहिलो पटक समानुपातिक प्रणाली मार्फत निर्वाचित भएका थिए भने बाँकी दुई पटक प्रत्यक्ष निर्वाचित भएका हुन् । उनले यसअघि पनि अरु धेरै अन्तर्राष्ट्रिय मंचहरुमा काम गर्दै आएका छन् । उनले दुई बर्ष अगाडि छात्रवृत्ति प्राप्त गरी अमेरिकास्थित हार्वड विश्वविद्यालयमा पनि केही समय अध्ययन गरेका थिए । त्यतिबेला उनीसँगै विभिन्न देशका शीर्ष नेताहरुले समेत अध्ययन गरेका थिए ।
