लमजुङको सुन्दरबजार नगरपालिका ९, भोटेओडारमा मंसिर १८ गते खुला पुरुष मिनी म्याराथुन प्रतियोगिता हुने भएको छ । बेंसीसहर नगरपालिकाको सिमानामा पर्ने उदिपुर गेटबाट भोटेओडार बगैंचा, सिउँडीबार, सुन्दरबजार कृषि क्याम्पसको गेट, पाउँदीबाट सिउँडीबार हुँदै भोटेओडार कृष्ण बगैंचासम्मको करिब १५ किलोमिटरमा दौड हुने आयोजक जिल्ला खेलकुद विकास समितिका अध्यक्ष योग बहादुर गुरुङ (कालु) ले बताए।
उनका अनुसार प्रतियोगितामा देशभर जुनसुकै ठाउँका जतिसुकै उमेरकाले पनि सहभागि हुन पाउनेछन् । प्रथम हुनेलाई नगद ४४ हजार ४ सय ४४ रुपैयाँ, मेडल र प्रमाणपत्र प्रदान गरिने भएको छ । द्धितीयलाई नगद २२ हजार २ सय २२, तृतीय हुनेलाई ११ हजार १ सय ११ साथै सान्त्वना हुने २ जनालाई जनही ५ हजार ५ सय ५५ रुपैयाँ, मेडल र प्रमाणपत्र प्रदान गरिने उनले बताए ।
जिल्ला खेलकुद विकास समितिले शनिबार पत्रकार भेटघाट गरी जिल्लामा पहिलोपटक म्याराथुन गर्न लागेको बताएको हो । प्रतियोगिता संचालन गर्न ४ लाख ६० हजार रुपैयाँ खर्च लाग्ने अनुमान गरिएको छ । गण्डकी प्रदेश खेलकुद परिषदले ४५ हजार रुपैयाँ बजेट व्यवस्थापन गरेको र बाँकी आफैं जुटाउने समितिले जनाएको छ ।
अहिले खेलकुद विकास समितिमा कुनै कर्मचारी नहुँदा काम गर्न समस्या परेको सचिव रोजी गुरुङले बताइन् । ‘खेल क्षेत्रको विकासका लागि धेरै योजना भएर पनि के गर्नु ? न कर्मचारी छन्, न बजेट छ,’ उनले भनिन् । बजेट प्राप्त भएमा धेरै प्रकारका खेल गतिविधि गर्न सकिने उनले बताइन् ।
