काठमाडौँ — राष्ट्रिय दुग्ध विकास बोर्डले दूधको मूल्य प्रतिलिटर १० रुपैयाँ बढाउन सरकारलाई प्रस्ताव गरेको छ । बोर्डका उपकार्यकारी निर्देशक बाबुकाजी पन्तले कृषि तथा पशुपन्छी विकास मन्त्री महेन्द्र राय यादवलाई भेटेर सो प्रस्ताव गरेका हुन् । डेरी उद्योग संघका अध्यक्ष राजकुमार दाहालका अनुसार नयाँ मूल्य सिफारिस गर्न गठित समितिले नै प्रतिलिटर १० रुपैयाँ मूल्य बढाउन प्रस्ताव गरेको हो ।यसअघि दूधको नयाँ मूल्य प्रस्ताव गर्नका लागि पन्तको नेतृत्वमा डीडीसी, पशु सेवा विभाग, डेरी उद्योग संघ, डेरी एसोसिएसन र किसानको प्रतिनिधित्व रहनेगरी समिति गठन गरिएको थियो ।
‘हामीले प्रतिवेदनमा १० रुपैयाँ बढाउन प्रस्ताव गरेका छौं, अब सरकारले यो निर्णय गर्छ’ दाहालले भने ‘बढेको मूल्यमा ७० प्रतिशत किसानले र ३० प्रतिशत उद्योगीले पाउँछन् ।’ हाल किसानले ४ प्रतिशत फ्याट र ८ प्रतिशत एसएनएफयुक्त दूधमा प्रतिलिटर जम्मा ५३ रुपैयाँ पाउने गरेका छन् । किसानबाट यो मूल्यमा दूध संकलन गर्ने संकलनकर्ताले प्रतिलिटर ३ देखि ४ रुपैयाँ लिने गरेका छन् । उद्योगीलाई प्रतिलिटर ५७ देखि ६० रुपैयाँसम्म लागत पर्ने गरेको उनले बताए ।
वाग्मती प्रदेशको दुग्ध विकास बोर्डले पनि दूधको मूल्य कम्तीमा प्रतिलिटर १० रुपैयाँ बढाउन सिफारिस गरेको छ । किसानलाई दूध उत्पादनको लागत बढिरहेको जनाउँदै प्रदेश दुग्ध विकास बोर्डको बैठकले किसानले नै कम्तीमा प्रतिलिटर १० रुपैयाँ मूल्य पाउनेगरी मूल्य वृद्धि गर्न संघीय सरकारसमक्ष अनुरोध गर्ने निर्णय गरेको हो ।
अबको १५ दिनभित्रमा दूधको मूल्य परिमार्जन नभएको खण्डमा पुन: बोर्डको बैठक बसी वाग्मती प्रदेशभित्र दूधको मूल्य परिमार्जन गर्न आवश्यक कदम चाल्ने निर्णय भएको प्रदेश सरकारले जनाएको छ ।
