काठमाडौं महानगरपालिकाका मेयर बालेनको बैठकले रेष्टुरेन्ट, होटल, पेट्रोल पम्पको शौचालय प्रयोग गर्ने निर्णय पारित गरेको छ। यो निर्णयले सार्वजनिक शौचालय नपाएर छटपटाउनुपर्ने काडमाडौं महानगरका स्थायी र अस्थायी बासिन्दाहरुलाई ठूलो राहत हुने छ । यसरी शौचालय प्रयोग गर्न दिने रेष्टुरेन्टहरूलाई प्रदान गर्ने सुविधाका बारेमा चाँहि निर्णय भइसकेको छैन।
गुनासो सुन्नको लागि सात दिनभित्र कल सेन्टर पनि स्थापना गर्ने निर्णय भएको छ भने दुईवटा इन्फ्रास्ट्रक्चर एम्बुलेन्स १० दिनभित्र सञ्चालनमा ल्याइने छ।
यस्तै महानगरपालिकाको फोहोरमैला व्यवस्थापनबारे अध्ययन गर्न नगर प्रमुख बालेन्द्र शाहको संयोजकत्वमा कार्यदल गठन गरिएको छ ।
उपमेयर सुनिता डंगोलले पनि हिंसामा परेका, अन्यायमा परेका र पीडित महिलाहरुको संरक्षण, आवश्यक कानूनी सहयोग तथा सहजिकरण र आत्मरक्षाको तालिम लगायतको व्यवस्थापनका लागि महानगरपालिकाका सबै वडामा वुमन सेल (महिला सेल) गठन गर्ने प्रक्रिया अघि बढाउने निर्णय गरेकी छिन् ।
उहाँले मेलमिलाप केन्द्र पनि प्रत्येक वडामा गठन गरी साना–तिना विवादलाई वडा तहबाटै निरुपण गर्ने उदेश्यले मेलमिलाप केन्द्रहरुलाई थप प्रभावकारी बनाउने बताईन्।
