राजीनामा दिएर आजै पुनः प्रधानमन्त्री नियुक्त हुने ओलीको तयारी

यदि यही तयारी अनुसार भयो भने पाँच वर्षअघिको घटना दोहोरिने छ। २०७३ मा ओलीले अविश्वास प्रस्तावमा मतदान हुनै लाग्दा त्यसको समना नगरी अन्तिम क्षणमा राजीनामा दिएका थिए।

नेपाली कांग्रेस, मोओवादी केन्द्र र जनता समाजवादी पार्टीले विश्वासको मत नदिने जानकारी ओलीलाई दिइसकेका छन् भने एमालेकै माधव नेपाल नेपाल पक्षले आज बिहान ९ बजेसम्म प्रधानमन्त्रीले पार्टी सहमतीमा सञ्चालन गर्ने प्रतिवद्धता नजनाए सांसद पदबाट राजीनामा दिने तयारी गरेको छ।

यसैगरी एमालेका अर्का एक नेताका अनुसार प्रधानमन्त्री ओलीले संसदमा विश्वासको मत नपाएपछि फेरि ठूलो दलको नेताको हैसियतमा प्रधानमन्त्री नियुक्त हुने तयारी गरिएको थियो। तर त्यसो गर्दा अल्पमतमा परेपछि फेरि प्रधानमन्त्री नियुक्त भएको जस्ता प्रश्न उठ्ने र विपक्षी दलहरूले बुहमत देखाएर सरकार गठनको दाबी प्रस्तुत गर्न सक्ने भएकाले अन्तिममा आएर राजीनामा दिने निष्कर्ष निकालिएको हो।

प्रधानमन्त्री ओली पक्षले ओलीले सुरुमा संविधानको धारा ७६ एक अनुसार प्रधानमन्त्री बनेको, संसद पुनस्थापना भएपछि एमाले–माओवादी केन्द्रको संयुक्त सरकार ७६ दुई अनुसार चलेको र अब ७६ तीन अनुसार ठूलो दलको नेताको हैसियतमा प्रधानमन्त्री नियुक्त हुन सकिने विश्लेषण गरेको छ।

७६ तीन अनुसार ठूलो दलको नेताको हैसियतमा प्रधानमन्त्री बनेर सरकार गठन गरेपछि एक महिनाभित्र विश्वासको मत लिनुपर्ने व्यवस्था छ। त्यो अवधीमा बजेट ल्याउन सकिने र बजेटमा लोकप्रिय कार्यक्रम ल्याएर जनतामा स्थापित हुन सहज हुने एमाले नेताहरूको तयारी छ। एक महिनापछि विश्वासको मत लिन नसकेको अवस्थामा पछि त्यही लोकप्रिय बजेट देखाएर अर्को चुनावमा जान सहज हुने विश्लेषण नेताहरूले गरेका छन्। राजीनामा दिएर पुनः प्रधानमन्त्री नियुक्त भएपछि आज नै संसदको विशेष अधिवेशन अन्त्य गर्ने तयारी छ।