पृथ्वी राजमार्गको आँबुखैरेनी–पोखरा खण्डलाई चार लेनमा विस्तार गर्ने काम सुस्त गतिमा अघि बढेको छ । गत वर्षदेखि काम सुरु भए पनि अपेक्षित प्रगति हुन सकेको छैन ।
८० किलोमिटर सडकलाई पूर्वतर्फ आबुखैरेनी–जमुने ९४१ किमी० र पश्चिम भागमा जमुने–पोखरा ९३९ किमी० गरी दुई भागमा विभाजन गरी चौडा बनाउने काम भइरहेको छ ।
रु ६ अर्ब २१ करोडको लागतमा पूर्वी भागको निर्माणको ठेक्का चिनियाँ कम्युनिकेशन कन्स्ट्रक्सन कम्पनीलाई र रु सात अर्ब ४ करोडको लागतमा अर्को चिनियाँ कम्पनी यानहुई काइयुन हाइवे एन्ड ब्रिज कन्स्ट्रक्सनलाई दिइएको छ ।
गण्डकी प्रदेशको लाइफलाइन पृथ्वी राजमार्गको महत्वपूर्ण खण्ड मुग्लिन–पोखरा सडकखण्ड ८८ किलोमिटर छ जसमध्ये आबुखैरेनी–पोखरा खण्डले ८० किलोमिटर ओगटेको छ ।
सडक विभाग आयोजना निर्देशनालयले निर्माण कम्पनीसँग २०२१ जेठ १७ गते पश्चिम खण्ड निर्माणका लागि सम्झौता गरेको थियो ।
पश्चिमाञ्चलमा एक वर्षमा ६ प्रतिशत काम सम्पन्न गर्ने भनिए पनि वास्तविक प्रगति एक प्रतिशतको हाराहारीमा भएको सडक फराकिलो आयोजनाको पश्चिम भागका इन्जिनियर नारायण पौडेलले बताए ।
जेठमा ठेक्का सम्झौता भए पनि भदौ मसान्तबाट मात्रै काम सुरु भएको उनको भनाइ छ ।
‘काम सुरु भएलगत्तै चाडपर्वको मौसम भएकाले कामदारलाई परिचालन गर्न सकेनौँ । साथै, महामारीका कारण चीनबाट उपकरण र कामदारहरू साइटमा ल्याउन सकेनन्। अहिले वर्षायामले काममा बाधा पुगेको छ,’ पौडेलले भने ।
हालसम्म करिब ९५ प्रतिशत रुख काट्ने काम सकिए पनि तीन किलोमिटर मात्रै खण्डको काम सकिएको उनले बताए ।
आर्थिक वर्ष २०२८(२९ मा स्तरोन्नति र फराकिलो कार्य सम्पन्न गर्ने समयसीमा तोकिएको छ ।
सडक विस्तारका लागि पश्चिमतर्फ खैरेनीटार बजार क्षेत्रबाहेक घर, गोठलगायत १३८ भौतिक संरचना भत्काइनुपर्छ । सडक आयोजनाले भत्काइएका संरचनाको मुआब्जा दिन रु दुई करोड ४५ लाख बजेट स्वीकृत गरेको पौडेलले बताए ।
“अहिलेसम्म ४२ घरधुरीलाई करिब ४० लाख मुआब्जा वितरण गरिएको छ । अन्य घरपरिवारलाई छिट्टै मुआब्जा उपलब्ध गराइनेछ,’ पौडेलले भने । उनका अनुसार पश्चिमतर्फ १२ वटा पुल निर्माण हुनेछन् ।
