दशैंका लागि पैठारी गरिएका सामान बोकेका कन्टेनरहरु गत सातादेखि नै नाकामा अलपत्र परेका छन् ।
कोभिड–१९ को सङ्क्रमण बढेपछि चीनले विभिन्न शहरमा लकडाउन गरेपछि नेपालतर्फ जाने तीन सयभन्दा बढी कन्टेनर उत्तरी सीमामा रोकिएका छन् ।
दशैं पर्वका लागि ल्याइएका अर्बौं रुपैयाँको सामान कन्टेनर ट्रकमा राखेपछि दुई सातादेखि नाकामा अलपत्र परेका छन् ।
रसुवागढी र तातोपानी नाकामा ढुवानी रोकिएकाले विगत दुई वर्ष झैं चाडपर्व किनमेलको सिजन पनि गुमाउन सक्ने चिन्तित नेपाली व्यापारीहरु बताउँछन् ।
सरकारले करिब चार महिनाअघि १० प्रकारका वस्तु आयातमा प्रतिबन्ध लगाएपछि आफ्नो व्यवसाय खुम्चिएको भन्दै नाका बन्द हुँदा व्यवसायीलाई दोहोरो धक्का लागेको हो ।
सरकारले विदेशी मुद्रा सञ्चितिको संरक्षणका लागि गरिएका शृङ्खलाबद्ध उपायहरु अन्तर्गत वस्तु आयात गर्नका लागि ऋणपत्र खोल्नका लागि शतप्रतिशत मार्जिन अनिवार्य रुपमा राख्नु पर्ने व्यवस्था गरेको छ ।
दुईतर्फी व्यापारका लागि खुला गर्ने सहमतिपछि चीनले उत्तरी सीमा नाका बन्द गरेको छ ।
‘सिगात्से र ल्हासामा बन्दाबन्दी लम्बियो भने व्यवसायीका लागि कमजोर अवस्था हुनेछ,’ नेपाल ट्रान्स हिमालयन बोर्डर कमर्स संघका अध्यक्ष अशोककुमार श्रेष्ठले भने । चाडपर्वअघि नै बन्दले नेपाली व्यापारीको अर्बौं लगानी डुब्नेछ ।
उद्योग, वाणिज्य तथा आपूर्ति मन्त्रालयका सहसचिव नारायणप्रसाद रेग्मीले भने, ‘हामीले हालै चिनियाँ समकक्षीसँग सीमा नाका बन्द गर्ने विषयमा छलफल गरेका थियौं । सिगात्सेमा बन्दाबन्दी नहटाएसम्म नाका नखुल्ने उनीहरुले बताएका छन् ।
चाडपर्वअघि नै नाका खोल्न नेपाली व्यापारीको दबाब छ ।
