कर्णाली स्वास्थ्य विज्ञान प्रतिष्ठानमा कार्यरत ६० चिकित्सकले असुरक्षाको कारण देखाउँदै सामूहिक राजीनामा दिएका छन् । एकेडेमीमा हाल एक सय चिकित्सक कार्यरत छन् ।
आन्दोलनरत चिकित्सकहरुले बुधबार प्रतिष्ठानका उपकुलपति डा मंगल रावललाई पत्र लेखेर सामूहिक राजीनामाको घोषणा गरेका हुन् । उक्त पत्र जिल्ला प्रशासनलाई पनि सिसी गरिएको थियो । उनीहरुले एकेडेमीका आकस्मिक बाहेकका सबै स्वास्थ्य सेवा ठप्प पारेका छन् ।
एकेडेमीको आकस्मिक इकाईमा कार्यरत मेडिकल अधिकृत डा करण साहमाथि भएको आक्रमण र त्यसपछिको अवस्था निकै डरलाग्दो छ । हामी राजिनामा दिन बाध्य छौं, रावललाई बुझाएको पत्रमा भनिएको छ । आन्दोलनरत स्वास्थ्यकर्मीले शाहमाथि झुटा आरोप लगाएर फसाउने प्रयास भएको दाबी गरेका छन् । उनीहरुले केही स्थानीय बासिन्दाले द्वन्द्व सिर्जना गर्ने प्रयास गरेको भन्दै चिन्ता व्यक्त गरेका छन् ।
गत भदौ १ गते प्रतिष्ठानका प्रशासकीय कर्मचारी धनबहादुर शाहीले आपतकालीन इकाईमा कार्यरत डा साहमाथि आक्रमण गरेका थिए । सीसीटीभी फुटेजमा शाहीले आफ्ना ६ वर्षीय छोरा पृथ्वीविक्रम शाहीको उपचारलाई बेवास्ता गरेको भन्दै साहलाई मुक्का र लात हानेको देखाइएको छ ।
प्रतिष्ठानले शाहीलाई ४५ दिनका लागि निलम्बन गरेको थियो । प्रतिष्ठानका निर्देशक डा पुजन रोकायाको संयोजकत्वमा तीन सदस्यीय छानबिन गरी अनुसन्धान भइरहेको छ ।
बालककी आमा आशा हमालले पनि उपचारका क्रममा डाक्टर साहले बालकमाथि हिंसा गरेको भनी भदौ २९ गते जिल्ला प्रहरी कार्यालय जुम्लामा उजुरी दिएकी थिइन् । उजुरीपछि जिल्ला अदालत जुम्लाले साहविरुद्ध पक्राउ पुर्जी जारी गरेको थियो ।
