काठमाडौँ – सोमबार दिउँसो बसेको एमाले सचिवालय बैठकको निर्णय अनुरुप नेकपा एमालेबाट मन्त्री बनेका नेताहरुले प्रधानमन्त्री समक्ष राजीनामा बुझाएका छन्। आज अपरान्ह उपप्रधानमन्त्री तथा अर्थमन्त्री रहेका विष्णु पौडेल सहित एमालेबाट मन्त्री बनेका नेताहरुले राजीनामा बुझाएका हुन्।
मन्त्रीपरिषद्मा एमालेबाट उपप्रधानमन्त्री तथा अर्थमन्त्री विष्णु पौडेल, कृषि मन्त्री ज्वालाकुमारी शाह, परराष्ट्रमन्त्री विमला राई पौड्याल, उद्योग, वाणिज्य तथा आपूर्ति मन्त्री दामोदर भण्डारी, स्वास्थ्य तथा जनसंख्यामन्त्री पदम गिरी, रक्षा मन्त्री हरि उप्रेती, महिला बालबालिका तथा ज्येष्ठ नागरिक मन्त्री भगवती चौधरी र भूमिसुधार मन्त्री राजेन्द्रकुमार राई रहेका थिए।
आइतबार साँझ संयुक्त राष्ट्रसंघीय मानव अधिकार परिषदको बैठकमा सहभागी हुन जान लागेकी परराष्ट्र मन्त्री विमला राई पौड्याललाई प्रधानमन्त्रीले रोकेसँगै आज बसेको एमालेको सचिवालय बैठकले सरकारबाट बाहिरिने र समर्थन पनि फिर्ता लिने निर्णय गरेको थियो।
